Visita ao Museo de Pontevedra e cidade monumental

Chegamos ao Museo sobre as 10 h desta fría e soleada mañá de febreiro. Paula Tilve estábanos agardando para guiarnos polos diferentes recunchos do Museo. Comezamos retrocedendo ata a Prehistoria: ferramentas de pedra, pezas de cerámica, como empezaron a traballar os metais, os monumentos funerarios... Aprendemos que a cultura castrexa deixou moitas pegadas en Galicia. As xoias de ouro da época romana deixáronnos abraiados. Na reprodución da fragata de Méndez Núñez sentímonos auténticos mariños do S. XIX. Co enorme cadro de Carlos III descubrimos o misterio da perspectiva do seu pé. A cociña tradicional galega axudounos a entender como era a vida doméstica dos nosos antepasados. Pasámolo moi ben, aprendemos un montón e, sobre todo, descubrimos o importante que é coñecer o pasado para entender o presente. Despois da merenda e dun rato de xogo coas pombas baixo un ceo azul e un sol que xa botabamos en falta , reunímonos con Raquel, a guía do Concello, na fermosa praza da Ferrería. Alí comezamos o noso percorrido pola zona vella de Pontevedra. A historia do loro Ravachol, a igrexa da Peregrina, o antigo Hospital, a casa máis antiga da cidade, o monumento aos heroes de Pontesampaio, a basílica de Santa María e as diferentes prazas onde antigamente se ubicaban os diferentes gremios e vendedores: praza da leña, do Teucro, da verdura.

Foi un percorrido apaixonante co que rematamos o proxecto de Historia!